نسرين 24 سنة : كنبغيه من قلبي وهو رافض يسامحني

السلام عليكم انا اسمي نسرين 24 سنة نعاود ليكم مشكلتي .انا طالبة تنقرا في الخارج وعلى علاقة بواحد السيد هادي اكتر من سنة. يلا باش مشيت الخارج هادي 6 اشهر وهو من نفس بلدي, تنبغيو بعضيتنا بزاف او قبل ما نمشي الخارج غلط فحقي بزاف اوسامحتو شحال من مرة اواعدني باش يتبدل على قبلي. فعلا تبدل اووليت تنحس بالحب ديالو كتر من الاول او كنا تنهدرو كل نهار في الحاسوب او جميع وسائل الاتصال حتى تينعس حيت الليل تيجي قبل عندهم. هو من النوع الغيور ومانع علي انني نخرج بالليل او نمشي نسهر في شي مكان او حتى يكونو عندي اصدقاء ذكور.

ولكن انا في الخارج كانو عندي صحابات ديما تيخرجو يسهرو او انا كانو تيديوني معاهم بعض المرات فاش تنبغي وهو مكانش عارف وايضا كان عندي زميل في الدراسة تنمشي انا وياه فالطريق ولكن ماكان بيناتنا والو غي اصدقاء. كنت تنهدر مع دراري اصدقاء في السكايب اوتنبقا مجمعا فاش تيكون هوا ناعس ولكن بكل احترام.

بعد 4 اشهر من ذهابي كان وقع مشكل وعرفني باللي سهرت واحد زوج مرات وبغا يتفارق معايا حيت مقلتهاش ليه و بقيت اسبوعين وانا تنحاول نخليه يغير رأيو وعيت منبكي عليه حتا اقتنع وارجعنا و أنا حبست كلشي مبقيت تنهدر مع تاواحد او مبقيتش تنخرج بلا منقولها ليه. فاش كملت 6 اشهر كانت عندي عطلة وقررت باش ترجع لبلادي باش نشوفو وحتا هو كان موحشني. المهم فاش تلاقينا كنا بزوج فرحانين وانا كنت جايبة معايا الكمبيوتر ديالي ومخليا فيه كلشي الصور والفيديوات والمحادتات القديمة. هو يتصدم نعتني بالكدابة وباللي كنت تنغفلو وهو عند راسو باللي ماتندير والو والسهير بزاف وزيد وزيد عيت من قوليه را دا كشي قديم وانا تبدلت ولكن دون جدوى مابقاش قادر يشوف فيا وفاش تنهدرو تيعيرني وتيتعصب مع العلم انو ماشي انسان عصبي واتفارق معايا وهادشي اثر ليه على خدمتو. مع العلم انو كنا شبه مخطوبين و تيعرف الام ديالي وتتعرفو وناوين نتزوجو فاش نسالي قرايتي. انا عمرني خنتو اولا فكرت نعرف شي حاد من غيرو ولمن هو ممتيقش. دابة فاش تنهدو تيهدر معايا عادي بحال الاصدقاء او صافي ولكن انا تنبغيه. شنو نديير ؟ شنو بان ليكم ؟