حياة من البيضاء: مشكلتي هي ماما كتخون بابا هادي 13 عام

لسلام عليكم، أنا حياة من مدينة الدار البيضاء عندي 26 سنة، ما عرفتش باش غاديا نبدى ليكم، راني مند سنة أو أكثر وأنا متتبعة لمجلة آش كاين وبالخصوص ركن الساطة والساط، وكنبغي نرسل ليكم مشكلتي وما كنقدرش، مشكلتي ما كنضنش تكون عند شي واحد، أنا راني أتعس إنسانة على وجه الأرض، كنموت في اليوم عشرات المرات، وشكون داها فيا ولا يحس بيا، مشكلتي هي ماما الله ياخذ فيه الحق، قبل ما تقولوا شوف كتدعي على ماماها أو مسخوطة ماماها، خليوني نكمل ليكم كيفاش كتقتلني ماما في حياتي وقلباتها لي جحيم، هادي 13 عام وماما كتخون بابا، كتمشي تخونو مع شي راجل مصاحبة معاه، عييت نبه فيها وننصحها وهي كتقول لي دخلي سوق راسك وما شغلكش، كتقولي باللي هي كتبغيه وهو صاحبها وكتقول لي راها ما كتعملش شي حاجة تغضب الله، الحب ماشي حرام.

أنا وكلت فيها الله وبغيت ربي يفضحها وما تجيش من عندي أنا، أنا كيبقى فيا بابا مسكين غافل وداير بحال المكلخ كيبغيها وكيعاملها أحسن معاملة وما نقاصها والو، وحتى الحياة الجنسية كيبان لي بابا طبيعي وما ناقصها والو، وهو أي بابا كيتيق فيها وما بغيتش نقولها ليه وندمر ليه الحياة ديالو، راه ممكن يقتل راسو لأنه كيبغيها بزاف وكيعمل ليها كاع اللي تطلب منو، آش نعمل الله يخليكم راه شي نهار غاديا تفضح وتخرج لينا على حياتنا كاملة وعلى سمعتنا، وما خليت ما درت معاها وما باغياش توب، جبت ليها حتى الأشرطة ديال الدعوة وما أترت فيها حتى حاجة، وكل مرة تمشي تبات مع هاداك خينا وتقول لبابا راها غاديا عند خالتي تبات عندها.