حياتي كلها دمرات واش أنا مسحورة أو آشنو واقع ؟

السلام عليكم ورحمة الله

انا مشكلتي كبيرة لكن غادي نحاول نختصرها ليكم عالله تساعدوني..

انا بنت من هذي 6 سنين وبالضبط من كنت فالسنة ثانية ثانوي حياتي تقلبات رأسا على عقب مبقيتش انا هي انا ,وليت مرفوعة , عصبية , تغيرت 180 درجة خصوصا في دراستي من بعد ما كنت انا الاولى وليت كنكره الدراسة وفين مانبغي نراجع دروسي ماكنقدرش وليت كنعجز نفتح الكتاب والى حليتو كيبان ليا كلشي ضبابة . .اي حاجة كنويها ويلا بغيت نديرها كتعكس حتى للمرة العاشرة عاد تصدق و الى صدقات عاد.. المحيط ديالي كايقولو لي انتي مصابة بسحر وحسد لانك جميلة جدا، لكن مكنتش كندخل هاد الكلام لراسي وبقيت على هاد الحال كنشوف بعيني العكس والنحس وما قدرا ندير والو غير نصلي ونطلب ربي يحيد من هاذ الشي اللي صابني.

المهم ماعرفتش كيفاش حتى نجحت وخديت الباك فدورة استدراكية من بعدها تخطبت وما نعاودش ليكم شحال تعكسات الخطبة من مرة عاد صدقات اما الزواج فحدت ولا حرج شي اسباب عكساتو ماشي مرة ماشي 20 لدرجة ان القاضي في المحكمة رفض يوقع على عقد زواجنا بلا ادنى سبب، فعرسي حتى هو اللي مادرتو حتى شفت مليون مشكلة , كذالك وقعات مصائب فيه منعرف منين نزلات علي بقيت صابرة وانا كنشوف حياتي الزوجية كتهدم بسباب ومن غير اسباب لدرجة انه لا هو ولا انا مكنفهموش علاش مكاينش حتى مشكل كندابزو وهو اصلا كل نهار الصداع والمشاكل فالدار والفراق والرجوع كل مرة …كلشي كيقول لي سيري فكي راسك لكن رفضت وعائلتي حتى هي رفضت ندخل فذاك الطريق وحتى فين مانبغي ندير الرقية الشرعية كتوقع شي حاجة وماكنديرهاش ديما لا انا ولا خوتي ولا حتى رجال الدين مكايقدروش يجيو وكتعكس الامور سبحان الله.

هاذ الشي اثر علي بزاف حتى مع علاقتي بالناس وصحباتي كتنقطع العلاقة فجأة وكيصبح الكره بيني وبينهم بدون سبب .. دابة انا طلقت بدون سبب كذالك وعايشة فاوروبا بوحدي دابة المشكلة اني اي خدمة كاندخلها كتوقع شي حاجة كنخرج منها واخا كنشتغل مزايان وكنترقى .. ديما النهاية معروفة عندي ..دابة عندي مليار مشكل ومكتفة وحاسة براسي مبلوكية ماقدرا ندير والو نفسية ديالي تدهورت ومكانخرجش من الدار.

سامحوني الى طولت عليكم ..وساعدوني الله يخليكم بالنصيحة.. آش نذير؟